The Broomfield Hill

"I'll wager, I'll wager wi' you, fair maid
Five hundred merks and ten
That ye winna go tae the bonnie broom fields
And return back a maiden again"

Leatherum thee thou and aw
Madam, I'm wi' you
And the seal o' me be abrachee
Fair maiden, I'm for you

"I'll wager, I'll wager wi' you, kind sir
Five hundred merks and ten
That I will go tae the bonnie broom fields
And return back a maiden again"

When she cam tae the bonnie broom hills
Her lover lay fast asleep
Wi' his silvery bells and the gay old oak
And the broomstick under his heid

Nine times 'roond the croon o' his heid
And nine times 'roond his feet
Nine times she kissed his rosy lips
And his breath wis wondrous sweet

She's taen the ring frae her finger
Placed it on his breist bane
And a' for a token that she'd been there
That she'd been there and gane

Greetin', oh greetin' gaed she oot
An' a-singin' cam she in
'Twas a' for the safety o' her body
And the wager she had won

"Whaur wis ye, ma bonnie gray hound
That I coft ye sae dear?
Ye didna wauken me frae ma sleep
Whan ye kent ma love was here"

"I scraped ye wi' ma fit, maister
And ma collar bell, it rang
And still the mair that I did scrape
Awauken wid ye nane"

"Haste and haste, ma gude white steed
Tae come the maiden till
Or a' the birds o' the gude green wood
O' your flesh shall hae their fill"

"Ye needna burst yer gude white steed
Wi' racing ower the howm
Nae bird flies faster through the wood
Than she fled through the broom"